A' toirt thugaibh na naidheachdan LGDT+ as ùire

Tagraiche taghaidh Ghleann Rathais air cogadh a ghairm an-aghaidh na coimhearsnachd LCDTQ

2019-11-20

1 mion.

Tha tagraiche taghaidh ann an Gleann Rathais air taic a’ Phàrtaidh Bhrexit a chall as dèidh dha cogadh a ghairm an-aghaidh na coimhearsnachd LCDTQ+.

Thàinig beachdan Victor Farrell am follais Diluain nuair a sgaoil BPA SNP, Jenny Gilruth, dealbhan-sgrìn de phuist a sgrìobh Farrell air Facebook ann an 2017 agus a tha fhathast rim faicinn air a’ phròifil phoblach aige.

Facebook Post le Victor Farrell

Ann an aon phost sgrìobh Farrell gun robh e a’ gairm cogadh an-aghaidh na coimhearsnachd LCDTQ air fad.

Chuir Peter Grand, tagraiche an SNP a tha ag iomair an-aghaidh Farrell airson cathair Ghleann Rathais, ìmpidh air a’ Phàrtaidh Bhrexit a chur às a’ phàrtaidh.

Dhearbh neach-labhairt a’ Phàrtaidh Bhrexit ris The Courier gu bheil iad air an taic aca a tharraing bho Fharrell agus nach eil iad ag aontachadh leis a bheachdan.

Tha Farrell a-nis gu bhith na sheasamh mar thagraiche neo-eisimeileach ach tha e air na beachdan aige ath-dhearbhadh ann am post Facebook an-dè anns an tug e iomradh air muinntir LCDTQ Fìobha mar “choimhearsnachd pheacail”.

Facebook Post le Victor Farrell

Faodar beachdan mun alt seo a chur thugam air Instagram no Twitter.

Cheumnaich Crìstean MacMhìcheil bho Sabhal Mòr Ostaig ann an 2010 le BA (le Urram) ann an Gàidhlig is Leasachadh. Tha ùidh mhòr aige ann an teicneòlas is e air iomadh làraichean-lìn Gàidhlig a chruthachadh thar nam bliadhnaichean, nam measg, tha Geidh.uk, Aimsir.info agus AbairThusa, a bha na chiad lìonra-sòisealta Gàidhlig.