A' toirt thugaibh na naidheachdan LGDT+ as ùire

Iomairt “ex-gay” gu bhith stèidheachadh anns a’ Chuimrigh

2008-04-22

1 mion.

Tha an Crìosdaidh Bun-chreidmheach (Fundamentalist Christian) chonnspaideach Stephen Green air ràdh gum faodadh iomairt ex-gay a bhith a stèidheachadh anns a’ Chuimrigh.

Tha an iomairt ainmeil airson daoine a bhrosnachadh gus “ùrnaigh air falbh nan gèidh” gus am biodh iad eile-sheòrsach.

Bha Mgr Green, a tha ainmeil airson a’ togail fianais an-aghaidh tachartasan pròise, a’ bruidhinn air a’ phrògram aithriseach Week In Week Out air BBC Wales.

Thuirt e ri Ian ‘H’ Watkins, neach-taisbeanaidh co-sheòrsach a’ phrògram, gun urrainn dha “coiseachd air falbh” bho co-sheòrsachd.

“Tha an teachdaireachd bhon a’ Bhìoball ag ràdh nach eil e gu diofar ciamar a chaidh thu gu bhith co-sheòrsach, chan fheum thu fuireach co-sheòrsach,” ars an searmonaiche.”

“Faodaidh tu coiseachd air falbh… tha ministrealachdan leigheis ann.”

“Tha sinn a’ beachdachadh air ministrealachd fhosgladh anns a’ Chuimrigh.”

“Chan eil mi a’ creidsinn gu bheil daoine co-sheòrsach air am breith co-sheòrsach,” ars esan.

“Cha leig Dia do dhaoine co-sheòrsach a bhith gam breith agus an uairsin can nach eil e ceadaichte.”

A bharrachd air seo rinn Mgr Green coimeas eadar Mgr Watkins agus marbhaiche Jeffery Dahmer:

“Tha an dithis agaibh a’ dol an-aghaidh facal Dhè – ’s peacadh a th’ ann an peacadh, ’s e peacadh a th’ ann an peacadh ann an sùilean Dhè.”

Faodar beachdan mun alt seo a chur thugam air Instagram no Twitter.

Cheumnaich Crìstean MacMhìcheil bho Sabhal Mòr Ostaig ann an 2010 le BA (le Urram) ann an Gàidhlig is Leasachadh. Tha ùidh mhòr aige ann an teicneòlas is e air iomadh làraichean-lìn Gàidhlig a chruthachadh thar nam bliadhnaichean, nam measg, tha Geidh.uk, Aimsir.info agus AbairThusa, a bha na chiad lìonra-sòisealta Gàidhlig.